நவராத்திரி முதல் நாள்: என்ன செய்ய வேண்டும்?

நவராத்திரி விரதத்தைப் போன்று எளிமையானதும் அதேநேரம் மிகுந்த பலன்களைத் தரக்கூடியதுமான வேறு விரதங்கள் இல்லை என்கின்றன புராணங்கள்.

சக்தியை நோக்கி அனுஷ்டிக்கும் விரதங்களில் மிகவும் முக்கியமானது நவராத்திரி விரதம். 

தனம், தானியம், நிலையான இன்பம், நீண்ட ஆயுள், ஆரோக்கியம், ஸ்வர்க்கம், மோட்சம் என ஒரு மனிதனுக்கு வேண்டிய அனைத்தையும் தரக்கூடிய விரதம் நவராத்திரி விரதம். 

நவராத்திரியில் ஒவ்வொரு நாளும் ஒவ்வொரு விதமான நைவேத்தியம், அம்பாளுக்கு சாற்ற ஒவ்வொரு விதமான மலர், ஒன்பது நாளும் வாசிப்பதற்கு ஒன்பது வகையான வாத்தியங்கள், அம்பாளைப் பூஜிக்க ஒன்பது வகையான மந்திரங்கள் என்று ஏராளமாக இருக்கிறது. 

அந்தவகையில் நவராத்திரியின் முதல் நாள் என்ன செய்ய வேண்டும் என்பதை இப்போது பார்க்கலாம்!! 

நவராத்திரியின் முதல் நாள் அரிசிமாவில் பொட்டுக் கோலமிடவேண்டும். இன்று மிருதங்கம் வாசிக்கத் தெரிந்தவர்கள் தோடி ராகம் இசைப்பது மிகவும் சிறந்தது. முதல்நாளில் அம்பிகையை இரண்டு வயது குழந்தையாக பாவித்து பூஜிக்க வேண்டும். அன்று அம்பிகையை வில்வத்தால் அர்ச்சனை செய்வது சிறப்பான பலனை அருளும். 

முதல்நாள் அம்பிகைக்கு வெண்பொங்கல் நைவேத்தியம் செய்து, கொலுவைப் பார்க்க வரும் பெண்கள் மற்றும் குழந்தைகளுக்குக் கொடுக்கவேண்டும். இதனால் அளவற்ற நன்மைகள் நமக்கு ஏற்படும். 

முதல்நாள் அம்பிகையை குமாரியாக பூஜித்தால் நமக்கு எதிரி, கடன் போன்ற தொல்லைகள் ஏற்படாமல் இருப்பதுடன் ஆயுள் விருத்தியும் செல்வ விருத்தியும் ஏற்படும் என்பது நம்பிக்கை!!! 

மேலும் பதிவுகளை வாசிக்க