தர்ப்பைப் புல்லின் மகத்துவம் | Nainathivu | நயினாதீவு

தர்ப்பைப் புல்லின் மகத்துவம்

தருப்பை (தர்ப்பை) இது புல்லின வகையைச் சார்ந்தது.புராணங்களில் துளசி , தருப்பை , வில்வம் ஆகியன உள்ள இடங்களிளே மிகப் பவித்திரம் வாய்ந்த இடங்களாகக் கூறப்பட்டுள்ளது.

நாணல் வகையைச் சேர்ந்த இந்தப் புல் ,தூயப் புல் ,தூப்புல் என அழைக்கப்படுகின்றது.ஸ்ரீ இராமர் திருமேனி பட்டதால் இது ஏற்றம் பெற்றது.நம் முன்னோர்கள் மங்கல – அமங்கல காரியங்களில் இதனை சிறப்பாகப் பயன்படுத்தினார்கள்.

இன்னும் வேத விதி அறிந்த வைதீகர்கள் பயன்படுத்துகிறார்கள்.

தர்ப்பைப் புல்லை நாட்டு மருந்து கடைகளிலும், கிரகணத்தின்போது கோயில்களிலும் பார்த்திருப்போம்.

இதன் மகத்துவம் ஏராளமானது. தர்ப்பைப் புல் புண்ணிய பூமி தவிர வேறு எங்கும் முளைக்காது. தர்ப்பைப் புல் வளர தண்ணீர் தேவையில்லை. தண்ணீல் இல்லாமலும் வளரும் இது, பல நாட்களுக்கு தண்ணீரிலேயே போட்டு வைத்தாலும் அழுகாத தன்மை கொண்டது.

சூரிய கிரகணத்தின் போது இதற்கு வலிமை அதிகம். இதன் காற்றுப்படும் இடங்களில் தொற்றுநோய்கள் அண்டாது.

அதனால்தான் கிரகண காலத்தில் இந்த தர்ப்பைப் புல்லை நாம் பயன்படுத்தும் உணவுப் பொருட்கள், மளிகைப் பொருட்கள், குடிநீர்களில் போட்டு வைக்கின்றோம்.

இந்த புல்லில் காரமும், புளிப்பும் இருப்பதால் செப்பு ஐம்பொன் உலோக படிமங்களை இந்த புல்லின் சாம்பலில் தேய்க்கிறார்கள்.

அவ்வாறு செய்வதால் அதன் ஓசை திறன் குறையாமல் இருக்குமாம்.

திருநள்ளாறு தலத்தின் தலவிருட்சமே தர்ப்பையாகும்.காலங்கள் பல கடந்தும் இன்றும் அழியாமல் இருக்கும் தர்ப்பை அதிசயமானது.